Anang jugau napi penguji globalisasi???

SIBU: Kaban Kunsil Nengeri (ADUN) Tamin, Joseph Mauh Ikeh minta mensia mayuh ke diau di menua pesisir proaktif agi (ngereja pengawa enda ibuh nganti orang bukai madah) lebuhka napi penguji ari globalisasi nengah Koridor Kuasa Tau Kena Baru Sarawak (Score) ti deka nguntungka semua rayat.

Ubah pendiau diri kena nganta ke Score: Mauh

Ku iya, tu beguna kena nyendiaka mensia mayuh di menua pesisir napi mayuh bengkah ubah dunya ngambika ulih nitih pemansang di menua tasik.

“Mensia mayuh enda patut ngembuan ati ti jampat puas enggau semua utai ti dikereja. Orang kitai patut agi meda jauh lalu ngembuan runding ti tebuka lalu ulih nitihka singkang pemansang menua.

“Anang semina diau aba penuduk ti sebaka. Kitai ulih ngubah pendiau diri, chunto iya enggau nukar chara tauka konsep betanam betupi ti tradisional ngagai betanam betupi ngena chara dagang ti mai tau penguntung. Anang sekali-kali puas ati,” ku iya lebuh pengawa ‘Pemimpin Bersama Rakyat’ di Rumah Pom Maja, Siong Tengah ditu kemari.

Lebuh bejaku pasal pemesai reti mudal mensia dalam SCORE, Mauh ngelalau apai indai meratika pemujur bala anak dalam pelajar sida.

“Pelajar ti diterima bala anak kitai diatu amat beguna ngambika sida ila ulih bela enggau ngemansangka menua,” ku iya.

Ku Mauh agi, Score deka nyendiaka mayuh pengawa kusong lalu tu endang siti peluang ti amat manah ke sida bala nembiak ngisi pengawa kosong nya.

“Kitai mega begunaka sida ke bisi pengelandik profesional, teknikal sereta enda tentu landik kena ngisi pengawa kosong ti deka disediakan Score di tengah menua Sarawak.

“Nya alai anang takut ngubah pendiau diri alu anang ngetu ngiga penemu. Enti kita sanggup belajar, kita mega ulih bepekit lalu nitih singkang orang bukai,” ku iya.

Mauh mega ngelalau mensia mayuh ngambika enda mudah ditipu enggau pemula bala penyakal ke bisi agenda kediri empu.

“Kitai patut nyeliahka semua isu ti diputar belit sida penyakal. Tuai raban bansa enggau tuai rumah dikingatka selalu besedia nerangka polisi perintah ngagai mensia mayuh laban polisi perintah endang adil sereta bela.

“Anang nitih parti penyakal ti enda mai pemansang ngagai rayat,” ku iya.

Mauh mega minta bala tuai rumah di genturung pendiau dalam kandang Kunsil Nengeri (DUN) ti dipegai iya ngambika sida meri data chukup pasal sida ke diau aba rumah panjai.

“Pengawa ngumpul data orang ke diau di rumah panjai besai guna aba kami ke nyadi pengari rayat ngambika kami ulih ngatur langgur pemansang di kawasan parlimen enggau Kunsul Nengeri (DUN) ti dipegai kami,” ku iya.

Mauh mega ngarapka sida ke diau di menua pesisir ulih nyukung lalu arapka perintah Barisan Nasional (BN) ngambika sida ulih ngasaika pemansang sosial sereta ekonomi ti lebih manah agi.

“Semina perintah BN aja ti ulih mai ubah nengah projek pemansang ti dipejalaika kena nulung rayat,” ku iya.

Lebuh pengawa nya mega, Mauh bisi meri bantu nengah geran projek mit menua pesisir (MRP) ngenyampau RM7,000 ngagai Kemiti Pengelikun enggau Pemansang Genturung Pendiau (JKKK) Rh Pom Maja, JKKK Douglas Langgi (RM8,000), Nyangai Alok (RM5,000), Ringgit Unchu (RM4,000), Dewan Balai Raya Siong Tengah (RM5,000) enggau Sekolah Kebangsaan Sungai Siong Tengah (RM2,000).

Dalam berita bukai ke ngayanka penampak Score di menua tu, kemari, Duta Besai Republik Azerbaijian ke Malaysia, Tahir Karimov madahka Republik Azerbaijian dengan deka tinjau peluang melabur dalam industri minyak enggau gis di Sarawak.

Tahir madahka, pengelandik menua nya ba sektor minyak enggau gis tau dikena ngangkat pemansang industri nya ba menua tu.

Ku iya, nya alai iya merambu ngambika menua Repulik Azerbaijian bekerejasama enggau Sarawak dalam pengawa dagang minyak enggau gis.

“Aku meda peluang dagang minyak enggau gis ba menua tu agi besai, nya alai udah tu ila aku deka ngangau orang dagang sereta pelabur ari Republik Azerbaijian tinjau peluang ba industri minyak enggau gis ba menua tu.

“Republik Azerbaijian bisi penelaba ba industri minyak enggau gis lalu enti penelaba nya dibai kitu dia iya ulih dikena ngemansangka industri nya ba menua tu,” ku iya.